Proud Kami Saimo!

Ni Resa Joy Domingo

Kadaklan na dahilan kung nata nagtutugdok ki saday na negosyo ang tawo iyo ang maging pagkukuwaan kan ikabubuhay. Igwa man ki huli sa kamawutan na makatabang sa kapwa. Ang iba mismong arong ang ibukasan para sa gabos para magtao ki serbisyo.

Reynaldo Dawal kan Brgy. Holugan

Siring kay Reynaldo Dawal, aki nira Juliana Dawal asin Guillermo Dawal. Saro siya sa mga residente kan Brgy. Holugan na ipinangaki kan Pebrero 21, 1965. Bisto siya bilang technician sa saindang barangay . Ang saindang arong ang tigdudulukan kan mga tawo na mawot magpairahay ki motor o ibang appliances huli ta sya may kakayahan asin kagamitan sa pag-irahay.

Nakakahanga ang saiyang serbisyo huli ta dai sya nagpepresyo sa saiyang mga kustomer. Buluntad sana ang saiyang tigahagad na kayang itao kan mga ini. Bukas ang saindang arong para magtao ki serbisyo maski matanga na. Alagad minsan pigpupugulan sya kan saiyang tugang ta may mga pagkakataon na mapukaw ang iba. Simbag niya sa saiyang tugang "Pano makakauli ang naghahagad ki tabang kung dai ko tatabangan?" Nagtutubod siya na "Kung makakatabang ka, matatabangan ka man."

Kung minsan na warang maibayad ang kustomer buda minsan kung nahahaluyan sa pag alat saiya, tigpapa-snack niya pa. Sigun pa saiya "Bako sana ang may mga inadalan ang dapat na ipagmalaki huli ta maski dai nakatapos may mga bagay na ipagmamalaki man sainda."

Halos masampulong taon na siyang nagseserbisyo sa mga tawo. Inihiras niya man kung pano siya nakaukod kan mga gibo sa vulcanizing. Kan sultero pa, iniba siya kan saiyang pinsan na technician sa Legazpi para turuan mag-vulcanize sa laog ki sarong semana. Ang produkto kaini iyo ang pagtabang niya sa anu man na problema sa motor asin iba pa na kaya nyang maitaong serbisyo. Bukod sa mga gibo nya sa pag-vulcanize , nakikiguti o nagtatabang sa paglinig sa Muladbucad Beach ang iba niya pang pinagkakaabalahan pero wara ining tighahagad na ano pa man na kapalit. Nasa pigtabangan niya na sana kung pira o ano ang maitatao bilang pasasalamat. May mga pagkakataon na snackan sana ang marisibi nya, maugma na siya.

Sigun pa saiya maggibo ki tama buda dai mag inom na halos malingawan na ang buhay, bago magtrabaho manguros muna, agadun sa taas na magkaigwang income. Dagdag pa niya, yaon sana siya duman sa arong ninda urualdaw kung may mangaipo man kan serbisyo niya.

Ang saiyang sebisyo tunay na ipagmamalaki kan mga tawo. Dapat ta syang pangarugan huli ta ang pagtabang kusang tinatao na hali sa satuyang kamawutan na warang ano pa man na pighahagad buda pighahalat na kapalit.

 Manito's Time, December 31, 2017