Planta sa Bonga magamit giraray pangapudan ki senior citizen sa LGU

Nira Glorilyn D. Reodique, Nerissa C. Daen, Salve Dagal buda Ma. Theresa D. Daen

Si Mr. Jose Yumang Daen, ang nangangapudan sa LGU.

Saro sa mga reklamo kan mga residente kan Manito an maluyang suplay kan kuryente o kaya an pagburubrownout buda biglang pagtaas-baba kani (fluctuation). Dahilan ini su boot kan pagkararaot kan saindang mga appliances arog kan TV, refrigerator, mga ilaw buda iba pa.

Dakulang perwisyo man ini sa mga opisina o sa mga may piggigibong reports na piggagamitan ki kuryente lalo an computer/laptop buda printer.

Pirang taon nang problema ini sa munisipyo kan Manito na sagkod ngunyan dai pa natatawan ki maray na solusyon.

 Nakauron kan Manito’s Time (MT) ang 87 anyos na si Mr. Jose Yumang Daen, sarong retired military officer, manungod sa powerhouse kan Manito. Segun saiya kan panahon ni dating Presidente Joseph “Erap” Ejercito Estrada ini naitugdok sa Bonga, sitio kan Pawa.

Mismong si Pres. Estrada ang nag-inagurar kaini na nagduman pa sa mismong lokasyon kan planta.

“Dakulang tabang kuta ini sa Manito…” sabi niya.

Pwera kaya sa power supply na nakukua digdi, pwede man ini magamit na dryer kan mga paroy. Maray su kuryente sa Manito kan nagpuon itong operasyon kan powerhouse alagad sabi kan ibang residente, makusugon su kuryente kaya may mga insidente ki pagputok ki mga ilaw sa ibang mga arong.

Nagamit ini ki tolo sagkod apat na bulan. Pakatapos kaito napundo su operation. “Turbina ang problema” sabi ni Mr. Daen.

Segun saiya, gamit na o secondhand na su turbinang ginamit sa powerhouse na ali sa Negros. Kun mabakal ki brand new na turbina, dai malangkaw sa limang milyon (< P5M) ang kakaipuhan na budget.

May pangapudan man siya sa Local Government Unit kan Manito manungod sa isyung ini. Sabi niya,

“Why not put a municipal resolution addressed to Cong. Salceda if they can help us to repair powerhouse in Pawa, Manito, Albay.” (Nata dai maggibo ki resolusyon na nakaaddress kay Cong. Salceda, baka lamang matabangan kita sa pag-repair kan powerhouse sa Pawa, Manito, Albay.)

Nag-aasa si Mr. Daen na matawan aksyon an saiyang pakiuron ta an mabenepisyo iyo man sana an mga taga-Manito.

Manito's Time, February 2, 2018