Kadeteng Maniteño, Midbidon!Ang kadeteng taga-Manito, Cadet 3Cl Mark Jonathan Asaytuno

Ang kadeteng taga-Manito, Cadet 3Cl Mark Jonathan Asaytuno

Sisay mag-uuna na igwa palan na taga-Manito na nag-aadal sa prestihiyosong akademya sa Pilipinas- ang Philippine Military Academy. Saro sana siya sa mga taga-Bicol na kadete na yaon sa laog kan nasabing akademya sa ngunyan, alagad siya sana solamente ang ali sa Manito. Midbidon ta daw kung sisay siya!

Siya si Cadet 3CL Mark Jonathan Dawal Asaytuno kan Barangay Hologan. Ikaduwa sa tolong magturugang. Sira Mr. Crisaldo buda Mrs. Corazon Asaytuno an saiyang mga magurang.
Nagtapos sa Hologan Elementary School taong 2008 asin ipinadagos an pag-adal sa Manito National High School hanggang Abril 3, 2012.

Nag-eskwela siya sa Bicol University na may kursong Mechanical Engineering. Natapos niya sana ang duwang taon bago siya naglaog sa Philippine Military Academy.
Aramon ta daw kung nata biglang naglipat siya ki kurso.

Nag-abot sa punto kan buhay ni Mark Jonathan ang mamili sa duwa: sadiri o pamilya. Kan mga panahong ito, nag-ilang si papa niya kaya nagkaigwang problema-pinansyal. Dai na siya matustusan ki maray sa pag-adal, pati pag-eskwela kan  bunso niyang tugang apektado. Kaya mas pinili niya ang pamilya niya. Mas pinili niyang siya ang magsakripisyo basta makaeskwela sana su tugang niya buda makatabang na man sa pamilya niya.

Nagkua siya ki Philippine Military Academy Entrance Test asin sa tabang kan Diyos, naipasar niya ini. Ngunyan kabilang siya sa 3rd Class (Golf Company) o second year sa PMA. Aminado siyang abo niya man talaga kuta na maglaog sa nasabing eskwelahan, alagad sa pagmawot na makatabang sa pamilya, sa paglipas kan panahon, namuyahan niya na man sana ini.
Pinakadipisil na taon para saiya kan siya nasa 4th Class o first year pa sana. Yaon sa mga panahong iyan ang physical training, mga magabat na aktibidad para mahubog an saindang lawas asin lalong mas kumusog ini. Sa panahong ito yaon ang grabeng pagdisiplina sainda.

Wara siyang piggagastos sa laog kan akademya, libre gabos alagad segun saiya, mapagalon talaga. Lalo na ang pagbanga kan oras sa mga gibuhon sa laog buda sa pag-adal.
Istorya niya, talagang makakanuod maging tunay na Pilipino ang kung sisay man na maglaog sa PMA buda an saindang honor code buda honor system mahigpit na pigsusunod. Gabos na gibo ninda dapat gibuhon na may COURAGE, INTEGRITY buda LOYALTY.

Silensyo sa klase buda seryoso sa pag-adal- iyan ang pagmidbid ni Mr. Gil Garcia, class adviser ni Mark kan siya 4th year high school. Saro man na maboot buda maray na barkada an iling saiya kan mga kaklase buda kabarkada niya.

Ang pinakadakulang pagbalo na namatean niya sa laog iyo ang pagkapungaw sa pamilya. Pagkakaigwa ki focus ang naging sekreto niya  tanganing malampasan ini asin ang iba pang kadipisilan sa laog.

Dakulang tabang man ang mga “foster parents” na pig-aapod sa PMA. Kada kadete igwa kaini; ang mga foster parents nakaistar man sana sa Baguio. Si Col. Erwin Rio Luga (Ret.) ang kay Mark Jonathan asin sa iba pang mga pag-iriba niya.

Maski nasa laog, dai niya man giraray nalilingawan na magsamba asin magpasalamat sa Diyos sa gabos na mga biyaya na pigtatao saiya. Kada Domingo presente siya sa PMA Evangelical Church kaiba ang iba pang mga kadete para sa worship service.

An pinaka-goal niya sa laog kan Academy iyo an malampasan niya ang kada taon. Malampasan ang mga pagbalo, ang pungaw sa pamilya, an academics buda ang mga training.

Pig-i-engganyar ni Mark Jonathan ang mga kabataang gustong mag-kolehiyo ki libre buda gustong maglaog sa PMA na magtake ki Entrance Exam, dai dapat  mababa sa 5’0” ang langkaw buda makakua dapat ki dai mababa sa 85% na average. Kung interesadong magkua ki PMA Entrance Exam, mag-text o mag-apod sa 09178964299 / 09285597651.

Sarong dakulang orgulyo an magkaigwa ki kadeteng Maniteño na magiging sarong magiting na opisyal sa maabot na panahon. Mawot niya na sana madagdagan pa ang mga mag-adal duman na mga taga-Manito.

-Glorilyn Reodique