Nata may mga menor de edad sa bulangan?

Ni Jonel D. Arizapa

Pirang taon nang nag-o-operate an bulangan sa Sitio Gogon kan Brgy. Pawa; dakol an nagbuburulang digdi, mapaaki man o gurang. An mga menor de edad dapat kuta nang igot na ipagbawal magduman.

                 Segun sa mga parabulang, libangan na ninda an pagbulang kada Sabado, Domingo, buda Pista Opisyal o holiday. Bako sana bulang an juegong presente sa bulangan kundi maging an dice. Duwang juego sa sarong lugar an mga nauukudan kan mga aki na dai makakatabang sa pag-asenso kan mga sadiri ninda.

Igwa nin mga parabulang na pig-iiba pa an mga aki ninda sa bulangan. Tigpapatangad pa ninda an mga aki na magjuego imbis na turuan sinda ki gibong marhay. Tigtuturuan pa lugod an mga inosenteng kaisipan na magsugal. Dai man lugod pagtaramon na ini sarong family bonding ninda ― sa arog katong lugar?

An mga aki na dapat kapot libro, an kapot mga manok na pambulang buda dice. An dapat na ituro kan mga magurang iyo an mag-eskwelang marhay bako an pagsugal na wara mang maitataong marhay. Dai man lugod pagpatangadon an mga aki ta dawa anong pagbawal kan mga magurang kung sinda mismo nagwi-juego, wara man giraray ining epekto.

An mga nauukudan sa pagkaaki dara sa paggurang. Kung aki pa sana nagbubulang buda nagda-dice na, sagkod sa magkapamilya buda maggurang padagus sinda sa salang gibong ini. Ining pagjuego sarong rason kung nata maluya sa pag-asenso dawa pa igwang hanapbuhay an pamilya.

Igwa nin mga barangay tanod na nagbabantay sa bulangang ini. Pigsisiguro ninda na marhay an pagkapark kan mga behikulong dara kan mga parabulang tanganing dai makaapa sa tinampo pasiring sa Sitio Bonga. Saro pang gibo ninda iyo an malikayan na magkaigwa ki iriwal. Sa mga gibo ninda, garo nalingawan na lugod na igot na iimplementar ang ipagbawal an mga menor de edad sa bulangan.

Sa kaaluyan, nasanay na an mga aki na nakakabwelo paduman sa bulangan. Dapat na ini mapundo ta an mga menor de edad bawal na marhay sa bulangan o mga sugalan.

Manito's Time, February 2, 2018