246 Forest Protection Officers tinipon, 52 hale sa Manito

Nagkaigwa ki orientation para sa mga Forest Protection Officers (FPO) o itong mga bantay gubat kani pa sanang bulan. Disyembre 1 in-orient an mga FPOs sa 2nd district, Disyembre 2 man an 1st buda 3rd district.

Photo: Hernil B. Dawal

An titulo kan programa iyo an “Capacity Building of FPOs on Lawin implementation and operationalization”, na pinagbusol nira Congressman Joey S. Salceda buda Congressman Alfredo A. Garbin Jr. kan Ako Bikol Partylist (AKB).

An katuyuhan kan programang ini iyo an (1) mabawasan an panganib buda mapakarhay ang kondisyon kan mga kadlagan buda (2) ma-update ang Department of Environment and Natural Resources (DENR) kung kumusta an kondisyon kan mga kadlagan.

246 na FPOs an hale sa segundo distrito asin 52 kaini an mga taga-Manito, na iyo daa ang igwang pinakadakol na delegasyon.

Photo: Hernil B. Dawal

Segun kay John Christian Toledo, patrol leader kan mga FPOs digdi sa Manito, dapat makatanom ki 100 semilya (seedlings) kada FPO, digdi sa Manito bakawan daa ang ipigtatanom. Sa laog ki sarong (1) bulan, dapat daa makasampulong (10) kilometro na rorondahan ang kada FPO.

Nagpuon na sindang magturukad sa mga bulod digdi sa Manito pirang aldaw pakatapos kan orientation sainda.

— Glorilyn D. Reodique, sa tabang ni Gemalyn R. Dawal

Manito's Time; December 31, 2017