Endorsement, ordinansa para sa UV express haloy nang pighahalat

                  Agosto 20, 2017—nagsurat ang grupo kan Alliance for Restoration of Righteousness and Morality (ARRM), Inc sa paagi ni Ronnie B. De Lumen, Manito Municipal Chapter Coordinator sa Sangguniang Bayan (SB) kan Manito manungod sa pag-agad ki endorsement sa pagkaigwa ki UV Express na may rutang Manito-Legazpi buda vice versa.

                  Enero 28, 2018-- nagsimbag si Kgwd. Malou Dagsil, Chairman kan Committee on Transportation, sa surat na ipinadara kan grupo. Sabi niya, ipigkonsulta niya ini sa Land Transportation Franchising and Regulatory Board  (LTFRB). Kaipuhan daa munang maggibo ang LGU ki Local Public Transport Route Plan (LPTRP) na iyo ang minimum requirement sa pagkua ki prangkisa para sa mga Public Utility Vehicles (PUV). (Sec 4: Guidelines, Joint Memorandum Circular No. 001 Series of 2017 Issued on 19 June 2017)

          Sa ibong kaini, nagpasalamat siya sa pag-opresir kan grupo ki dagdag na lunadan na ang senior citizens buda PWDs ang prayoridad na mabenepisyuhan. Sabi niya pa, aasikasuhon ninda tulos ang pagpreparar kan LPTRP ta nganing maitao ninda ang pighahagad kan grupo pati na man kang publiko.

          Pebrero 5, 2018—nagsurat si Danilo Maravillas, President & CEO kan Jericho Developer & Management Services (JDMS), Inc. kay Mayor Joshua Mari C. Daep para mag-apply ki business permit para sa pagkakaigwa ki private terminal kan aircon van express.

          Nabanggit niya sa surat na igwa na ki endorsement ang City Government of Legazpi asin nagpahayag ki pagtugot sa request nindang magkaigwa ki UV express. (#13 Resolution No. 14-0305-2017, Sangguniang Panlungsod, Legazpi City) Parehas pigsuratan nira Mr. De Lumen ang Manito buda Legazpi manungod sa bagay na ini.

          Su Legazpi City Government, nagkaigwa na ki hearing manungod sa surat na pinadara ninda. Pakatapos, nagtao na ini ki endorsement buda naggibo na ki resolusyon.

          Ipig-follow-up niya man ang formal endorsement kan munisipyo na magkaigwa ki aircon van express ta nganing makatabang sa mga commuters lalo na sa mga senior citizen buda PWDs.

          Inatendiran nira Danilo Maravillas; Adam Maravillas, Operations Manager, JDMS; Ronnie B. De Lumen, Municipal Coordinator, ARRM; Kgwd. Malou Dagsil, Chairman Committee on Transportation, Manito; Rene Leonardo buda Antonio Guevara Jr., mga commuter sa Manito su public hearing kan Oktubre 13, 2017.

          Ipigheras ni Mr. De Lumen ang eksperyensya niya bilang commuter, naranasan niya ang minasunod:

Overloading

Dai nasusunod ang seating capacity

Late na pag-ali kan PUJs aling Manito sa paghalat ki mga pasahero

Kung walo (8) sana o mas diit pa ang pasahero, ipiglilipat kan mga driver ang mga pasahero sa ibang jeep

          Sabi man ni Kgwd. Dagsil manungod sa pagkaigwa ki byaheng Manito-Legazpi kan aircon van express, igwa ki nagka-tolong (3) barangay sa Manito an igwang parehas na request. Kan Marso 21 binasa sa SB session ang surat ni Mrs. Amy Dañas na muyang maging operator ki UV express.

          P80 man ang ipigpropose na pamasahe kontra sa P100 na pig-estimate nira Mr. Maravillas sa 42 kilometrong byahe.

          Sa ngunyan, pighahalat na sana kan grupo nira Mr. Maravillas iyo ang formal endorsement kan LGU-Manito buda ordinansa sa pag-issue ki business permit para sa terminal.

— Glorilyn D. Reodique

Manito's Time March 31, 2018 issue