Sanitary Landfil na sabi, kumusta na?

Pirang taon na ang Manito? Kung pira ang simbag iyo na man iyan kaaloy na warang tultol na tapukan an satong munisipyo buda warang marhay na waste management.

Napapasain su mga basura ta? Kung dai naitatapok sa tamang tapukan, iyo iyan ang minailo sa daga buda sa mga katubigan ta.

Isipon ta sana kung pirang supot ki basura ang natitipon sa sarong semana, bakong dakol nang dati? Pano pa daw sa sarong taon?

Ang Manito saro sa mga munisipyo na warang sanitary landfill. Sa Manito’s Time issue kan nakaaging Hulyo 31, 2017, may mga ipinagirumdom ang Environment Management Bureau (EMB) kan Department of Environment and Natural Resources (DENR)manungod sa basura.

Duman man nabanggit ang isyu manungod sa pagpapagibo ki sanitary landfill. Sinabi ni Vice Mayor Lito Belludo na pig-uururunan na daa sa session ninda ang pagbakal ki daga na pwedeng gibuhon na dump site. Dakulang pondo daa ang kinakaipuhan para digdi kaya baad daa mag-donate na sana si Mayor kan daga ninda sa Balasbas ngani gibuhon na sanitary landfill digdi sa Manito.

Ma-limang bulan na matapos ipaluwas ang isyung ito. Kumusta na daw su pig-uururunan sa sesyon? Sana matawan na ini ki solusyon ta mahihiling tan a kadaklan sa mga tawo nagtatapok sa mga bakanteng lote, na ipigwawagas man kan mga hayop o kaya minsan kan paros.

Dai ta na paghalaton na mas dumakol pa ang basura ta tibaad alunon kita kaiyan sa maabot na panahon. Magkalot sa likod kan harong, ipagbulag ang nalalapa buda dai nalalapa na basura, irecycle an dapat irecycle, buda itapok sa tamang basurahan ang patos kan dulsi o kun ano pa man na kinaunan. Iyan muna ang magigibo ta sa ngunyan habang naghahalat na makagibo ki sanitary landfill buda ma-implementar ang solid waste management plan sa satong banwa.

-- Glorilyn D. Reodique

Manito's Time, December 31, 2017