Mga taga-Cawit nadiskriminar

                 “Pag  masakay sa banwa pigtataraman kami na may mga virus daa kami. Garo kami na sana su pigkakaarati kan sige an tararam na may virus kami”, ini su naging sentimiento nira Maria del Puso buda Merlinda Barcelon, parehong taga-Cawit na duwa sana sa mga nagsapar kan diskriminasyon kan mga nakaaging aldaw.

                 Ini may koneksyon sa kaso kan nagadan na aki na pigsususpetsahan na may meningococcemia daa. Halos kadaklan kan mga taga barangay ang apektado kaini ta kada mabalyo sinda sa sentro, yaon ang pag-iwas sainda ta igwa daa sindang “virus”. Maski ang mga paratinda ki sira pig-iiwasan na man.

Saro si Lenie Dalde sa mga nakaranas kaini, segun sa post niya sa facebook buda base na man sa istorya niya, dai siya pinasakay buda sinayumahan siya kan tricycle driver.

Hagad man ni Maria del Puso na dai  na sinda ipagkaati na mga taga-Cawit, dai na pagpasupgan ta an totoo daa wara man ki virus  sa saindang lugar. Ta kun igwa man daa di dapat kato pa kuta dakol na an mga insidenteng arog kaito.

--  Nira Glorilyn D. Reodique, Gemalyn R. Dawal, Ma. Theresa D. Daen buda Jonel D. Arizapa

Manito's Time, November 30, 2017