Hanging bridge sa Cawit matatapos na!

Matatapos na an hanging bridge na makonekta sa Pangsod asin Cawit. Ini proyekto daa ni Cong. Joey Sarte Salceda sa tabang man kan Local Government Unit (LGU) kan Manito.

An on-going construction kan hanging bridge sa Cawit. Base sa facebook post kan Manito LGU, P5M an budget ninda digdi. Photo by Manito LGU through Marvin Azueta.

Pebrero 21 kan ini pinunan. Segun kay Kgwd. Bibiana Dado, may budget na 5M hale sa National Government. Masarig an tulay na ini nin huli ta pwede ining maagihan ki mga single na motorsiklo. “Magayon kung igwa kaan na tulay ngani an mga motor makabalyo na digdi, dai na kaipuhan ipakiwalat sa Pangsod.” Ini an pahayag ni Baby Rose Lopez, sarong residente kan Brgy. Cawit.

Dakulang pasalamat man kan mga residente kan barangay an pagkakaigwa ki hanging bridge sa saindang lugar. “Dakulang tabang talaga tangani an pagbalyo bakong delikado… lalo kung may kalamidad, an tulay talaga an salbasyon mi, iyan na footbridge madaling ma-wash-out lalo pag-iagihan ki baha.” Ini an pahayag ni ex-Kapitan Ernesto Daen.

Dagdag man ni Kgwd. Dado, “mas madali na an pagbalyo lalo na kung may mga emergency, lalo kun banggi ta pwede nang isakay na sana sa habal-habal bako na sa motor pandagat.” Segun man kay Gregorio Delpuso manungod sa pagtutugdok kan tulay,”magayon ta importantehon samuya digdi an tulay.”

Pasalamat man an mga estudyante ta bako nang delikado an pagbalyo ninda. Segun kay Lady April Ala, senior high school student, ”mas madali na po an pagbalyo mi kun maeskwela buda dai na po kami apektado dawa may mag-aging bagyo, makakaklase man po giraray

kami ta masarig na an tulay.”

May nakapaskil na mahahaman ini ngunyan na Hulyo, alagad sabi ni Else Gnilo, saro sa mga trabahador, mga katapusan pa daa ini kan Agosto matatapos.

-Gemalyn R. Dawal

Manito's Time, July 31, 2017