MULA SA BAHAY AT ONLINE REVIEW LANG, TAGA-MANITO, PASOK SA TOP 8 NG LEPT ELEMENTARY LEVEL 2026

 ni:  Chrissanta D. Bayna

Pinatunayan ng isang guro mula sa Barangay Cawayan, Manito, Albay na hindi hadlang ang kakulangan sa pera  o hindi pagpunta sa face-to-face review centers upang maging isa sa mga pinakamahusay sa Licensure Examination for Professional Teachers (LEPT) na ginanap noong Marso 15, 2026.

Si Lorena Ardales Llamera, gradweyt ng Bachelor of Elementary Education mula sa Bicol University - Daraga ay isang ganap na Licensed Professional Teacher (LPT) na nakakuha ng rating na 93.20% at nakamit ang ikawalong pwesto sa nasabing eksaminasyon.

Sa panayam, ibinahagi ni Lorena na ang kanyang paghahanda ay nagsimula pa noong Hulyo ng nakaraang taon hanggang sa araw ng eksaminasyon. Dahil nais niyang makatipid, pinili niyang mag-aral sa loob lamang ng kanyang kwarto at gumamit ng online review programs.

"At first po, September LET ang first plan ko but since feeling ko I'm not yet ready, I decided to take it last March. Nagstart po ako magreview nung July hanggang March sa bahay lang," aniya.

Idinagdag pa niya, "Nag-enrol po ako pero through online lang since mas tipid siya. At humihiram po ako ng mga libro sa mga friends ko since ayoko bumili kasi additional gastos lang 'yon."

Ayon sa topnotcher, ginugol niya ang halos walong oras o higit pa araw-araw sa pag-aaral. Mahalaga aniya ang consistency at disiplina, kahit na may mga pagkakataong nawawalan ng gana o motibasyon.

Aminado si Lorena na hindi sila mayaman, ngunit ang walang sawang suporta ng kanyang mga magulang na sina Henry Llamera  at Lorna Llamera, at ng kanyang mga kuya ang naging puhunan niya upang magtagumpay.

"We are not rich, but my parents and my kuyas' love and support made me feel so rich that pushed me to strive harder," pahayag ni Lorena.

Gusto rin niyang patunayan na ang pag-top sa board exam ay hindi lamang para sa mga may kakayahang magbayad ng mamahaling review centers.

"Gusto ko i-prove sa sarili ko at sa iba na topping the board exam is not only for those who are privileged enough to enroll face-to-face. Kahit nasa bahay ka lang, may chance kang mag-top at ipagmalaki ang pamilya mo." Dagdag pa niya, "Honestly, my goal is kahit top 10 lang talaga since I don't want to expect especially napakadaming takers all around the Philippines na matatalino and magagaling. It's really a miracle if makakabilang ka sa topnotchers.  Right now, I just want to feel the moment and of course to continue imparting knowledge to the learners."

Sa kasalukuyan, si Lorena ay nagti-training sa isang pribadong paaralan sa Albay kung saan ikalawang araw pa lamang niya nang malaman ang magandang balita.

Ito ang payo ni Lorena para sa mga balak mag-exam  at sa mga hindi pinalad sa unang subok sa LEPT,

"For those future LEPT takers, the journey along the way is really not easy; sometimes you'll feel unmotivated, and you'll doubt your own capabilities. But what's important is to reflect and ask yourself, why are you doing this? Is it only for yourself? Or for those people who believe in you, especially your family, who are always there to support you in order to achieve your goals in life. You have to focus on your dreams and be consistent because topping the board exam is not only about intelligence, but it also requires consistency, perseverance, patience, and strong faith in Almighty God."