Apat na residente sa Manito inabutan nin tabang kan Mayon Guardians

 

Mga myembro kan MGBI habang pigbabati an mga benepisyaryo matapos an awarding.

Apat na residente hali sa iba-ibang barangay kan Manito an natawan nin tabang sa charity event na isinagibo kan Mayon Guardians Brotherhood Incorporated (MGBI) sa Manito People’s Centrum, kan nakaaging Domingo, Pebrero 26, 2023.

Sa panginginot ni CGMF Joven Abenion kan (MGBI),  isinagibo an charity para makapaabot nin tabang sa apat na kwalipikadong benepisyaryo sa Manito. An mga benepisyaro na sara Salvador Obido (Malobago), Celso Bachicha (Tinapian), Purificasion Mapa (Parada, Buyo), asin Melinda Berja (Balabagon) ay nakaresibe nin 20 kilos na bagas, grocery items asin cash na nalikom kan organisasyon hali sa nagkapirang mga isponsor.

Segun kay Mr. Abenion, saro sa obheto kan saindang organisasyon an makatabang sa siring kaining mga benepisyaryo na dae na nin kakayahan na makapaghanap-buhay. Sa saiyang mensahe sa event, sinabi niya sa mga myembro kan MGBI na “kaya ta man makatabang maski dae kitang kwarta”. Segun pa saiya, bako sa saindang organisasyon hale an mga itinao sa mga benepisyaryo. An saindang organisasyon sana an naggibo nin programa kun papano makalikom nin maitatao.

Segun man kay Misis Melinda Berja, saro sa mga benepisyaryo kan nasabing event, “Maogma ako na may mga nag-isponsor sa arog kaini, buda maogma man ako ta saro ako sa napili  ta warang-wara man talaga kami.” An mga benepisyaryo nagpaabot man nin pasasalamat sa mga isponsor asin sa MGBI para sa pagkundusir kaining programa.

An Mayon Guardians Brotherhood Incorporated nagpapasalamat man sa tabang asin suportang itinao kan mga minasunod na isponsor: Hon. Mayor Rebecca D. Chen; ABC President Eleuterio Daep Jr; Magayon Beach Resort; “marikoy and parikoy” kan Cabacongan; asin sa 15 kapitan kan 15 barangay na sakop kan Manito.

Kinabanggihan kan charity, sa kaparehong lugar, sarong “Dance Party for a Cause” man an isinagibo kan MGBI na inisponsoran ni It-ba  Barangay Captain Willam “We” Daen asin Pawa Barangay Captain/ABC President Eleuterio Daep Jr. Segun kay Mr. Abenion, mawot kan pabayle na makalikom nin kwarta na itatao sa nagkapirang mga myembro kan MGBI na sa ngunyan ay naghahampang sa kadipisilan.

-- Romnick Añonuevo