Pitong Elementarya Nag-gradweyt, 100 Junior High Nag-Moving-Up sa ALS Manito; Pinakagurang na nagtapos sa Junior High 74 Anyos

       Isinagibo ang ika-14th Elementary Graduation asin 3rd Junior High School Moving-Up Ceremony para sa 107 na mga estudyanteng nakapasa sa programang Alternative Learning System o ALS sa distrito kan Manito.

 

       Pito sa elementarya ang nag-gradweyt asin 100 ang Junior High School completers hali sa man iba-ibang community learning center kan Manito. Ginibo ang seremonya kan Agosto 7, 2023 sa Manito People's Centrum.

 

       Nagtao nin pang-inspirasyon na mensahe an guest speaker na si Maria Victoria S. Lopo, 2018 ALS graduate na kung sain inestorya niya an dipisil na pinag-agihan sa buhay asin an pag-asa na naitao kan ALS puon kan nagbukas ini para saiya.

 

       Nagpasalamat man siya sa mobile teacher na si Mr. Henry Nobela ta sa ngunyan gradweyt na sa kolehiyo si Ms. Lopo.

 

       Segun kay Antonio Echague, outstanding completer, "Maski stable naman ako ta may negosyo ako pero iba man talaga giraray pag nakatapos ki pag-eskwela, gusto ko pa mag-adal." Graduate siya sa ALS kan elementary asin ngunyan natapos niya naman ang junior high.  Muya pa niyang mag-enrol sa ALS Senior High sa Manito National High School.

 

       Nahiling man ang ngirit sa kaugmahan kan 74 anyos na si Adelina Ballesteros, siya an pinakagurang na nagtapos sa junior high school ngunyan na taon asin saro man siya sa mga outstanding awardees Naawardan pa siyang Inspiring Learner. Segun saiya mapadagos pa siya asin maenrol sa senior high sa ALS man giraray.

 

Iling ang ngirit ni Adelina Ballesteros, pinakagurang asin saro sa Outstanding Completers 

       Bago natapos ang nasambit na seremonya, an saro man na outstanding completer asin may dakol pang mga awards na si Renelyn Arizapa nagpasasalamat sa saiyang mga tagapagtukdo asin mga kaklase.  Segun saiya bako lamang sa akademiko ang tigaturo kan saiyang mga maestra asin maestro pati na ang maray na pag-ugali.

 

       Dagdag pa niya, ang pag-iribahan ninda sa eskwelahan bako lang magkakralase kundi sarong pamilya na nagdadamayan ngani maukdan kan gabos ang leksyon. Tighikayat niya ang kapwa niya kaklase na magpadagos pa sa pag-adal.

 

       Sa seremonyang ini nag-atender ang Public Schools District Supervisor na si Mr. Edgar O. Orellana; Division ALS Focal Person, Mr. Jay S. Oliquino; Education Program Specialists II , Mr. Rey Daep, Ms. Madonna Mallilin, Mr. Eric Vibar asin Mr. Gerimond Lladoc; Manito Central School Principal, Mrs. Melba D. Salting; LGU Representatives, Hon. Rene Espedido asin Engr. Jeric Quirona; Guest Speaker, Maria Victoria S. Lopo; ALS Teachers asin Community Implementers, mga magurang, graduates, completers asin iba pa.

-- Chrissanta Deladia Bayna