DNX Tigers Asin Manlainlain na Grupo Naghatod ning Kaaraman Asin Pagmakulog sa Kapalibutan sa Nagotgot

 

Itaas:  mga nagpartisipar sa tree planting sa Banao, Nagotgot.
Ibaba: nagkakawat na mga aki sa BIDA (Batang Iwas Droga) sa pangengenot kan CCM-CSC

Nag-tree planting asin nagtao nin programa kontra droga ang grupong pinangenotan kan DNX Tigers sa Brgy. Nagotgot kan Abril 30, 2022.

 

Nagpartisipar ang manlainlain na indibidwal asin grupo siring kan Mighty Red Dragons, Manito’s Time, Mayon Guardians Brotherhood, Manito Central School (MCS), Manito Advisory Group for Police Transformation and Development (MAGPTD), Manito Municipal Environment and Natural Resources Office (MENRO),  Rural Health Unit (RHU), Provincial Environment and Natural Resources Office (PENRO) Albay, asin Municipal Disaster Risk Reduction Management (MDRRM) Quick Response Team.

 

"Saving Narra Project" an naging tema kan aktibidad na nagpoon alas-8:00 nin aga .  Inibahan nara Kagawad Hormina asin Kagawad Dioneda an grupo sa lugar na tigkunsidiran kan tree planting.

 

Tigkundisir man bandang alas 9 y media ang drug awareness and prevention program para sa mga aki na tig-aapod na BIDA (BATANG IWAS DROGA).  Laom kan programa na habang aki pa maaaraman na nakakaraot ang droga  kan buhay, matawan an aki ki tamang disiplina, iwasan ang droga, asin turuan ang aki na maging maray, matupad ang pangarap, asin makaiwas sa bisyo.

 

Segun kay Ma'am Mary Jane Toledo Soriano,  co-founder asin event coordinator, ang BIDA ay sadiring advocacy kan president ng DNX Tigers Inc. na si PMAJ MANUEL A. DIONISIO II. Nagpoon an siring na aktibidad kan 2016 kan nasa Catanduanes pa siya na-assign. Yan man an saiyang naisip na kontribusyon sa bayan bilang kasimbagan sa panawagan kan gobyerno na sugpuon an problema sa droga.

 

Dinara ni sir Dionisio or "Dionix" ang programang BIDA maski saen siya madestino, halimbawa kan na-assign siya sa Manito. Kan nilipat siya sa Albay Police Provincial Office (PPO) nadipisilan siya magpadagos kan programa kaya naisip na gumibo nin NGO para masustinar ang programang ini. Duman namundag an DNX Tigers Inc.

 

Segun pa kay Soriano, “Ako bilang co-founder, pinalawak ko an advocacy kan DNX na maliban sa BIDA, dinagdagan ko siya nin iba pang causes arog na ngani kan sa environment, disaster management, education, medical aid, atbp. Ang mga benepisyaryo kan mga programa bako lamang po sa Manito kundi sa bilog na Bicol. Ako taga-Manito kaya po may mga programa po na priority ang mga taga-Manito an benepisyaryo.

 

Dakul an naugma sa nagibong programa.  Segun sa sarong magurang kan aki na kaiba sa aktibidad “dakulaong pasasalamat sa bumuo kan programa na natawan an mga kaakian ning libreng kaaraman sa epektong dulot kan droga asin sa saindang magurang na matabangan sindang madisiplina an kaakian.  Mga gamit sa pagbasa asin mag iba-ibang kakanon an itinao kan mga nagboluntaryong magtabang sa programa.

 

Ugma ang nahiling sa kaakian lalo na kan nagpakawat na pinanginotan kan Community College of Manito -- College Student Council (CCM-CSC). “Maraming salamat DNX Tigers!” Ini an kurahaw kan mga aki asin ina na nag partisipar.  Dagdag pa ni Soriano, “Hinihikayat ko kayo na makibahagi at gawin ang nararapat bilang isang responsableng mamamayan. Ini po an pagsirbi nin udok sa boot. Pure volunterism po para sa good causes.”

 

--  Rechelle Belista Dajac