Us-us na Sistema sa Kinaban

Image from: aboy daen @ Breakfast for White Eye Chicks

 

Makangalas pag iling-ilingun
Mga magagayong bayong na makukulayun
Mga kahoy na mataraason
Sa manigong kinaban na matuninong
 
Sa sarong papel na kapidaso
Sirbing Patunay na pagsadiri nin saro
Kaherak na ibang linalang
Nawaran na nin maiestaran
 
Sa kadlagan man o magin sa katubigan
Mga lalag ng hayop wara nang mapadumanan
Makaskas na nawawara an natural na tig iiruan
Kawsa kan mga tawong gulpi sa kamuyahan
 
Mga buhay-dagat na wara nang malanguyan
Mga bayong na wara na malayugan
Mga lalag na hayop na wara ng mapirmihan
Ano pang kaipuhan para mga tawo matawuhan?
 
May recreational hunting pang naaraman
Paggadan nin mga lalag na hayop gigibong kaugmahan
Warang pagkonsidirar sa epekto kan ginibo
Masunod sana an pansadiring gusto
 
Mga maiilyas na hayop makaskas na nauubos
Illegal na tiggagadan o tigdadarakop
Trukis an madali buda maateng kwarta
Na ipapakaon sa sadiring pamilya
 
Sa zoo maiiling mga hayop na nakakulong
Sa sadit na kwadradong hawla na bako uyon sa sainda
Mga sanktwaryo na kadidit sana
Na Kun iisipon: mga tawo bako kawaran sa kinaban
 
Tawo an nataramang pinakaintelektwal sa mundo
Nata sadiri sana an laog kan sintido
Pano man an mga hayop na nakaistar sa kinaban
Dae maitindog an sadiri kontra sa sistemang gibo sana para sa tawo
 
Tawo man o mga hayop pantay an karapatan sa kinaban
Pero an mga hayop mas dakul an katungkulan
Mga tawo na asa sana sa kapalibutan
Makaukod man kuta na ini pangataman.