280 SALCEDA TESDA Trainees Nag-Mass Graduation sa Manito People's Centrum

Screenshot hale sa Facebook account ni Mr. Henry Nobela

          280 na trainee ki iba-ibang kurso ang pigdeklarar na gradwar sa Mass Graduation kan Sustainable Livelihood and Community Enterprise Development Assistance (SALCEDA) Program ni Cong. Joey Sarte Salceda kan Disyembre 11, 2019 sa Manito People's Centrum.  Kapartner sa programa ang Technical Education and Skills Development Authority (TESDA), Alternative Learning System (ALS) sa panginot kan Manito TESDA coordinator na si Mr. Henry Nobela, LGU Manito, buda Department of Education (DepEd).

              Ang mga kurso iyo ang mga minasunod: Electronics Products Assembly and Servicing (EPAS) NC II, Shielded Metal Arc Welding (SMAW) NC II, Dressmaking NC II, Driving NC II2, Massage Therapy NC II, Beauty Care Services (Nail Polish) NC II, buda Construction courses na ginibo sa mga Barangay.

               Sigon Kay Mr. Raymund Ll. Daen, may Heavy Equipment pa na ihahabol na mapuonan ngunyan na Disyembre 2019. Siya ang naging speaker para Kay Congressman Joey Sarte Salceda na kaipuhan mag-atindir sa Bicameral Conference Committee meeting kan Kongreso.   "Sa ngayon from 50 graduates, meron na tayo ngayong 280," sabi pa niya.

          Nagheras man si Mr. Daen ki istorya manungod sa pagiging TESDA graduate na sabi na pig "lang" lang. "TESDA graduate lang po ako." Tinawan niya ki importansya ang maging NC II holder na sigon saiya "Dapat you should be proud na saro kang TESDA graduate... as a matter of fact saro sa matindog kan idustriya pasiring sa pagbungkaras kang ekonomiya kan Pilipinas, saro sa may dakulang papel, kamo po na mga TESDA graduate. Kamo po ang considered na backbone kang satuyang ekonomiya... Kaipuhan ta ngunyan ki mga skilled workers."

          Sigon pa saiya"Ang Manito ang magiging balon kang mga skilled workers.

          Pinasalamatan man ni Mr. Daen ang mga kapartner kan SALCEDA Program: TESDA, ALS, LGU Manito buda DepEd, na kun dai sainda dai man magiging posible ang nasabing proyekto.  Ang paliwanag niya dai man makakayanan ang nasabing proyekto ki sarong tawo lang kaya sa paagi niya pinabot sa mga kapartner buda sa mga bago na gradwar ang pasasalamat ni Congressman Joey Sarte Salceda.

-- Shem Viñas