Apat na parasugal naaktuhan

Apat na parasugal sa Sampaguita Village Sitio Parada kan Brgy. Buyo an naaktuhan kan mga kapulisan na nagsusugal kan Hulyo 26, 2018 nin banggi.

         May concerned citizen su boot na nagtext sa kapulisan asin kan pig-verify ni COP Rolando Guiriba kaiba an selected personnel kan saiyang team an lugar, nagpositibo ini. Naabutan an mga ini na nagsusurugal pero nainutan su boot sindang mailing kun kaya nakadulag an mga ini.

            Sigun kay COP Guiriba, “Nakaputan ko kuta su saru para nakadulag man gilayon biyo pa ngani nagkagirisi so bado pero na-identify mi man kun sirisay sinda. Tanod pa ngani an saro.”

          An mga naaktuhan iyo sina Rodolfo Abarientos Sr., Rodolfo “Panopio” Abarientos Jr., Alexander “Nong” Dawat Jr. , asin Rommel Dawat y Dayson.

         Magkakaigwa nin inquest proceeding kun nadakop an mga ini pero nin huli ta nakadulag sinda pigsangatan na sana an mga ini nin regular filing. Papanindugan su boot kan mga kapulisan an saindang statement ta igwa sinda nin actual intelligence ta nailing ninda ini.

       Dagdag pa ni COP, pwedeng tigkukunsenti ini kan mga opisyales kan lugar ta kun dai sinda kuta an nagdulok kaini baku an concerned citizen.

-Mary Joy Principe buda Welsie Abellano