12 tanod, BHW, lupon kan Cawayan, inali sa pwesto

12 tanod, BHW(Barangay Health Workers) buda lupon kan Brgy. Cawayan  an inali sa posisyon manungod sa memo kan DSWD na nagbabawal magtrabaho sa nasabing posisyon an nakakaresibe nin social pension. Sigun sa memo bawal o dae na pwede magtrabaho an igwa na nin nareresibeng pension arog kan Senior Citizen Pension. Ipapatupad ini sa bilog na Manito. Pigmiting ni MSWDO Officer Myrna Ferrer  buda Marilou Velasco kan Hunyo 19, 2018 an mga opisyales asin pinapili an mga ini kun pension o trabaho sa barangay.

An naali iyo an mga minasunod; Domingo Antonio Sr. (Utility Worker), Carlito Magno (Chief Tanod), Rodolfo Mabelin (Tanod), Bonifacio Orquin (Tanod), Benedicto Benitez (Tanod), Estela Berjuega (BHW), Melvin Babasa (Chief Lupon), Justino Padilla Sr. (Lupon), Hermino Abril (Lupon), Alberto Peñarubia (Lupon), Arnulfo Lerin (Lupon),  Amador Reales (Lupon). Hanggang Setyembre pa sinda makakaresibe nin honorarium.

             Sa ngunyan may apat ng salidang mga tanod asin lupon. Iyo sinda Argie Magno (Tanod), Bong Arias (Tanod), Maricel Mediona (Lupon) asin Alvin Lerin (Lupon). Bulan nin Oktubre mapuon an mga bagong salidang tanod asin lupon.

 Sigun kay Kapitana Anita Ardales,  “Kun igwa sa pamilya kan mga dating opisyales na pwedeng isalida iyo ang prayoridad kun wara bukas mag-apply an muya magserbe sa barangay.”  Dagdag pa ni Kapitana so mga naaling opisyales makakaresibe man giraray ki ₱100.00 na gratipikasyon kada bulan bilang onra kan saindang halawig na serbisyo sa barangay.

       Saro pa sa pigbubusol ni Kapitana ngunyan na magkaigwa nin dagdag na tawo sa lalong pag-uswag kan barangay. Nagdagdag siya nin tulong (3) tanod, lupon, utility, BHW asin Brgy. electrician. Ang honorarium kaning dagdag na tawo hale sa honorarium ni Kapitana hanggat dai pa naipapasar sa budget kan barangay.

—Mercy Mabilin buda Janiza Benitez