Aldaw nin Pagrumdom

Ni: Jonel Arizapa

Paingalo muna sa trabaho

Magdalaw muna sa sementeryo

Linigan, pinturahan an igdaan

Kan satung mga padaba na nagpaingalo na.

Magpadukot nin kandila

Maglaan nin udok na pangadyi

Para kay katung May, Pay, o kun ki isay

Sa pagrumdum kan sinda pa nabubuhay.

Rumdumon an saindang mga agi-agi

Pasalamatan gabus nindang naitabang

Tawang importansya gabus na experyensya

Sa mga panahon sa sinda pa satung kaiba.

Sarong aldaw sa sarong taon

Para sa sainda satuyang gugulon

Dai ta na sa sainda pagkaitun

Na sinda makaiba sa diit na panahon.

Dawa sa mga natural na aldaw

Pwede man kita sainda magdalaw

O mag-alay ki misa para sa sainda

Maipailing sana an saindang importansya.

Makamundo sanang isipon

Pag bako aldaw nin kalag

An lugar kan saindang permanenteng paingaluan

Nagiging gakudan ki baka buda iba pa.