Pangapudan kay bagong Kapitan buda Kagawad

Ni: Jonel Arizapa

         

            Natapos na ang eleksyon para sa SK buda Barangay kan nakaaging Mayo 14, 2018. Arog kang ibang nakikipagsapalaran, may mga bwinenas, may mga dinimalas na manggana. Pero para sakuya, bako man sana iyan patungkol sa pagka-bwenas, sinda sana talaga pano ang napulsuhan kang mga tawo na kayang magserbi sa barangay buda sa mga tawong barangay/gumibo kang mga trabahong pambarangay­­--lugod man na arog kaini ang kaisipan kang lambang saro sa satuya sa pagpili sa sainda.

             

             Panibagong palakad hali sa mga ibinoroto ta sa mga posisyon para sa panibagong taon kan saindang administrasyon—lugod na bako sana ang taon ang magkaigwa ki pagbabago. Ngunyan na Hunyo, ang mga bagong luwas na mga lider ay nanumpa na para sa saindang mga tungkulin/serbisyo. Dai man lugod sinda magka igwa ning amnesia nganing dai ninda malingawan ang saindang mga pangako kang nangangampanya pa sinda. TOTOONG SERBISYO PARA SA TAWO. Mga urog ming ginagalangang mga chairman buda kagawad; dawa dai na tabi nindo totohanun ang mga magagara nindong plataporma, basta mangyaring magkaigwa ki matanos buda duro-diretsong suplay ki malinig na tubig sa kada lado kan saindong nasasakupan; matabangan lamang nindo na magka igwa nin trabahong may integridad ang kada saro; asin magkaigwa nin malinig buda ligtas na arong ang gabos—ikakaugma mi na ito.

                       Isipun ta man na ang kaisipan kang mga namamayo ang dapat na maging maray na ehemplo sa gabos. Igwa sinda ning karakter na bako sana ang reputasyon ang pig-iingatan. Igwa man sindang mga katangian arog kang pagkakaigwa ning takot sa Diyos, may respeto sa lambang tawo, may integridad asin ang pagsumikap na maging produktibong tawo— bako so pagka adik sa sugal, sigarilyo, asin mga parabuyungon na kapitan buda kagawad.

                   Sa mga bagong opisyales kan barangay: maitao ang mga primerang pangangaipo kan mga tawo arog kang malinig na suplay nin tubig, maray na suplay nin kuryente asin trangkilong istaran.

                         Para man sa mga SK chairman dangan kagawad: lugod mapunan nyato ang sarong malinig na pamamalakad. Mabago na lugod ang maating kinatuudan na pamamalakad sa pulitika.

                       Lugod na dai na paka pokusan an mga baraylehan, paliga o pag papakaray sana kang mga basketball court. Mas pa jan ang responsibilidad asin kakayahan nindo. An pagpapadagos kan Alternative Learning System (ALS) sa kada barangay para sa mga muya pang makatapos sa primarya asin sekondarya ang saro sa dakul pang magiginibo nindo; pag tao nin mga impormasyon manungod sa magayun asin maray na lifestyle nganing mailagan an pagka adik sa mararaot na bisyo (sigarilyo, inom, sugal, asin iba pa); pagtao nin respeto sa lambang saro prior mente sa mga miyembro kang komunidad kan LGBT;  mini library para sa satong mga kabataan; pagpadaba sa kapalibutan asin dakulon pang iba.

                    Lugod na maging responsible an satuyang mga lider alagad gamitun ki tama asin matanos an saindang posisyon. Kamo na ang magiging mga magurang kan saindong mga nasasakupan asin mangangalaga kan kada karapatan kan lambang saro.

Updated: July 18, 2018