Serbisyo o Pondo?

Ni Jonel D. Arizapa

Arani na naman an eleksyon. Sa Mayo 14, 2018 mapirili na naman an mga botante kun sisay an muya nindang ilaag bilang mga lider kan kabataan buda barangay.

                Nagpapaaramot na an mga kandidato sa iba-ibang paagi. Igwa nin garo serbisyo kan Hong na libreng sakay. Igwa man nin nagpapadrino sa libreng pabayli. Kadaklan halos magtanglay na an panga sa kangingirit sa kun siisay na maagihan. Arani na talaga an eleksyon.

              Iba-ibang klase nin tawo an mawot magdalagan sa eleksyon. Kada saro igwa nin sadiring intensyon. Igwa nin muya talaganag magtao nin totoong serbisyo sa tawo. Igwa man nin nagkapira na dahil sana sa personal na intension, muya magkaigwa nin income.

Dai kita magpadara sa mga paulok-ulok na tigpapailing satuya. Dai ta pagbasehan an pagsadiring tawo ta nganing mamuyahan na botohon. Dai pagpilion an igwa na nin nagkagirinibong sala sa barangay, lalo man sa warang nagkagiribong ikakarahay kan barangay. Botohon ta an sa iling tang makakagibo nin tama kan mga obligasyon buda responsibilidad bilang nasa posisyon. Igwa nin mga incumbent na sa gilayon muya magdalagan sa eleksyon. Sinda minsan ta nang ilinaag sa posisyon kaya igwa na kitang pwedeng pagbasehan kan saindang nagkagirinibo sa laog nin pirang taon.

Pilion ta an nagtatao nin oras para sa ikakarahay kan tawo. Dai ta na pagpilion an warang nagkagirinibong ordinansa o proyekto.

Dapat maging madunong kitang mga botante. Botohon ta an mga nagdadalagan  na an muya magtao nin marhay na serbisyo sa tawo bako an tigmamakulugan sana an pondo.