Patakaran sa eleksyon ibiniklad, voting age sa SK nabago

Siniguro ni Mrs. Sarah Jane Sales-Escoto, Election Officer kan Commission on Elections-Manito (COMELEC) na 100% nang preparado ang komisyon para sa maabot na eleksyon sa Mayo 14.

Tapos na ang parasahan kan certificate of candidacy (COC) kan Abril 20, nagpuon na man ang campaign period kan Mayo 4 hanggang 12. Nasa 417 ang nag-file kan saindang kandidatura sa bilog na Manito para sa SK buda barangay level.

Balik sa mano-manong proseso ang botohan ngunyan na eleksyon bakong arog kan 2016 na may gamit na Precinct Count Optical Scanner (PCOS) machine.

Edad 15 hanggang 30 ang pwedeng magboto para sa SK, 18 asin pataas man ang pwedeng magboto sa barangay. Lininaw man ni Mrs. Escoto na ang edad 15-17, sa SK sana maboto. Kaya kung laog ang sarong botante sa parehas na age bracket (halimbawa edad 20), duwang beses siyang maboto—sa SK buda sa barangay.

Ipapaskil man sa luwas kan mga polling precincts ang listahan kan mga registered voters.

Pagirumdom ni Mrs Escoto sa mga kandidato sa paparaning campaign period na sa mga designated common poster area sana sinda pwedeng magpaskil ki mga campaign posters ninda. Kung sa mga pribadong arong o establisyemento, kaipuhan ang pagtugot kan tagsadiri.

Base man sa guidelines kan COMELEC resolution, may sukol sanang dapat sunudon para sa mga campaign materials. 2ft x 3ft para sa tarpaulin, 8 ½ in x 14 in para man sa pamphlets, leaflets, stickers buda cards. Magiging illegal campaign materials ini kung magsobra sa mga sukol na itinao kan COMELEC.

Pwede man sindang magkaigwa ki jingle. Alagad pagirumdom niya giraray sa mga kandidato na P5.00 sana dapat ang magastos ninda sa kada sarong botante sa pangangampanya.

Pig-engganyo man ni Mrs. Escoto na kung pwede recycled materials ang gamiton na mga campaign materials buda bako su mga hazardous o mapanganib na gamit.

Kung duwang balota ang itao sa mga botanteng edad 18-30, dai magngalas ta sabi ni Mrs. Escoto, parehas sakop kan SK buda barangay ang mga edad na ito. Pwede man na magpili sana kung sain maboto ang botante, alagad mas maray kung parehas na balota ang susuratan.

May COMELEC checkpoint kada semana, gun ban na nagpuon kan Abril 14 na madurar hanggang Mayo 21, buda liquor ban sa mismong aldaw kan eleksyon. Bawal man magsulog, maggamit o kaya manao ki mga T-shirts, kayab, kalo, leaflets na may ngaran kan kandidato sa mismong aldaw kan eleksyon ta sarong porma ini ki pagkampanya.

Saro sa mga problemang nakahampang kan ahensya kan pag-file ki kandidatura iyo na duwang form ang pigpapasa ki sarong kandidato. Halimbawa kandidato siya para sa SK chairman, nakapasa siya ki COC para sa SK chairman buda SK kagawad. Naresolbaran man ini tulos kan ipinaapod sinda buda inapot kung anong posisyon talaga ang pigdadalaganan ninda. Sala sana daa su pakafill-up.

Sa Mayo 14, solamenteng sadiri sana ang dadarahon kan mga registered voters para makapartisipar sa pirilian.

Maigot man na seguridad ang sinigurado kan kapulisan kaiba ang mga militar sa pagbabantay sa mga presinto.

— Glorilyn D. Reodique kaiba si Ma. Edeliza An buda Mark John Francis Rebullar