Pagal asin Kunswelo sa Barko

Ni John Rey Mangampo

1Bako nanggad pasil maging paraluto sa barko

Lalo kung mairuon baya kalan na piglulutuan mo,

Bantayan mo ki maray saimong mga kaldero,

Mamangnuhan mo na lang ututo na palan sa puro.

2Pagmata pa sana, makalula na sa pagmate mo

Pano man baga todo na ang rolling kang barko mo.

Garu kang buyong na naglalakaw pasiring sa banyo

Sa mga handrailings baya nangaputon ka nin todo.

3Pakatapos kan saimong mapaspason na pag-ipos

Garu ka si “The Flash”! Sa kusina dalagan ka tulos.

Magluway pababa sa agihan tibaad ka mapalos

Sa maragkot na salog, pandok mo baad makamusmos.

4Painiton ang kalan asin iluwas ang lutuon

Bungkalan mo su kaldero asin su bahaw rumuson.

Magtadtad ki bawang tapos iubay mo sa sanlagon

Dai sana malingawan su bunay na piprituhon.

5Pakatapos makaluto kan saindang pamahawan

Maipos ka naman para sa saindang pangudtuhan.

Hangusan ki ararum, minapuon pa sana ang laban

Paspasan ang iro ta maluto ka pa kang pamanggihan.

6Bako baya madali ang trabaho na linaugan mo

Lalo kung nag-aagi kamo sa dagat na peligroso.

Habang nagpepreparar nangangadyi ka nin pasikreto

Na sana dai masukahan sabaw na pigaluto mo.

7Sa kusog kang alon, ang suka pirit mong pipugulan

Sayang baya kang bunay asin Spam na pinamahawan

Pero pag dai talaga kaya, sa CR ka dalagan

Ang suka mo baya garu su nadaya na naman sa inuman.

8Sa barko pakurusugan nanggad ki boot ang labanan

Pagal, pirot asin mundo ang saimong mamatean

Lalo kung may pag-iriba kang ang ugali iba man,

Tiusa sana, sampulong bulan pa kamong maibahan.

9Padagos lang! Ang laban mo minapuon puon pa sana

Ang Finish Line mo dai pa riraw, harayuon pa

Dipisil ang aagihan pero pasasaen man baya

Ang gabos mong  sakripisyo may kapalit man na ginhawa.

Manito's Time, March 31, 2018