Masain Ka?
Masain Ka?
ni: Nelson B. Añonuevo
Kun an buhay sinusungko nin grabeng sakit, kasabay kan tanglay asin agrangay.
May namuyang magtukad sa bulod, bako para magpapresko,
Kundi makipagtagalan sa init kan panahon.
May nagkakapot nin Manebela bako paduman sa pasiyaran,
Kundi para sa sintimong ali sa nagsasarakay.
May naglalaog sa pagtukdo na kun ilingon maugma
Kundi may tiga tagong pagal, problema sa pamilya.
May pangadyi na grabe an paghagad tabang bakong ali sa simbahan,
kundi aling ospital,
may nagkakantada nin paghagad tawad bakong ali sa prosesyon
Kundi gikan sa mga tawog nakulong.
An mga barahang nakalatag, bako duman sa sugalan
Kundi sa nagtatangis, sa lamay kan gadan.
Ang nagtutugot na dai magturog bako sa pagbuyong
Kundi para sa trabahong mapagal inguwahon,
sa mga guwardiya nag nagtatanod sa iba
Alagad winawalat ang sadiring pamilya,
kaiba ang naglilinig kan salming nin opisina, maating salog,
Kun mag-uli sa harong sanli ni alpog.
May nagkakapot nin laugan kun minsan lata o pampatos
Bakong kakanon kundi gamit sa paglimos.
Sa pagtapos kan aldaw, may paingalo man o wara,
ang dara kan nagpapagal, nagsasakit bakong- ugma,
Kundi paghapot na inihahatod—“masain?”
Dangan an simbag maski sa totoo napapagal na
“kun sain darahon kan kinaban
na mapagal sabayan”
Imahe: Lorenzo Princi https://pin.it/33CEzs0
Post a Comment