Mga magurang, Government Organizations, NGOs nagpartisipar sa Brigada Eskwela kan MNHS

Ang Alumni batch 1991 habang nagpipintura kan lanob kang computer room.

Photo credit: Nerissa Daen

               Katakod kan nagpuon nang ralaogan, tiggibo kan Manito National High School (MNHS) an saindang Brigada Eskwela kan Mayo 28, 2018 sagkod Hunyo 2, 2018  sa pangengenot ni Mr. Christian Dado, MNHS Brigada Eskwela Coordinator.

Mga magurang buda estudyante na nakisumaro sa inot na aldaw kan Brigada Eskwela.
Photo credit: Nerissa Daen 

    
          Nagsuporta digdi si Mayor Gem Daep. Yaon man an mga kapulisan kan Manito sa pangengenot ni COP Rolando Guiriba, an mga empleyado kan Manito LGU, an Manito RHU na nagtaong libreng serbisyong medikal arog kan pag check-up kan dugo buda blood sugar. Nagtao man sindang mga bulong sa pangengenot ni Dr. Conception kasabay ang health team kang Provincial Goernment of Albay buda nagkundusir sinda ki forum manungod sa diabetes. Presente man ang Manito’s Time buda BFP buda an iba pang Government and Non-Government Organizations.

Si Famela Aldea, representante ali sa RHU buda ang mga magurang na nagpartisipar sa forum manungod sa diabetes.
Photo credit: MNHS fb page

                    Nakisumaro man ang Alumni Batch 1991 kan MHNS. Sinda ang nagpintura kan lanob kan saro sa mga computer rooms kan eskwelahan. Segun sa istorya nira Rowena Avides buda Lorna Sebastian, mga opisyales kan batch ’91, napagplanuhan na ninda ang pagpintura digdi kan reunion ninda kan Marso 24, 2018. Nagtipon sindang kwarta para makabakal ki pintura na sinda na man mismo ang nagpintura kan lanob.

                  Saro man sa mga magurang na nagbrigada para sa saiyang aki iyo si Rafaela Dagta na nagheras kan saiyang namatian sa pagpartispar sa brigada. Segun saiya, “Maugmahon ako ta nalilinigan ang eskwelahan buda nakakapagtanum man digdi.”

Si Rafela Dagta, saro sa mga magurang na nagbrigada para sa siyang duwang aki.
 Photo credit: Nerissa Daen

  
                  Nagkaigwa man ki promo ang eskwelahan na picture printing na ang bayad nakadepende kung anong sukol ang gusto ipaprint buda libreng T-shirt printing para sa mga gusto magkaigwang souvenir. Nagtao man ki libreng school supplies sa mga estudyante. Nagkaigwa man ki seminar workshop manungod sa newswriting na itinuro ni Mr. Ramon Eugene Daen, publisher kan Manito’s Time.

Si Mr. Joel Daen, saro sa mga maestro kan eskwelahan, ang mga writers kan Manito's Time na boluntaryong nagpartisipar  sa brigada, Ms. Shirley Satuito, Secondary School Principal II buda Mr. Christian Dado, MNHS Brigada Eskwela Coordinator.
Photo credit: Nerissa Daen

--Ma. Theresa Daen