Ex-Mayor Daep ilinubong na

Tuminalikod na sa kinaban an dating alcalde na pigmimidbid na “Ama kan Manito” na si Atty. Caesar S. Daep kan Agosto 31, 2017. Siya ang ama kan presenteng alcalde na si Mayor Joshua Mari C. Daep asin agom kan dati man na alcalde na si Mrs. Carmencita C. Daep.

Mga nakidapit nakapila para sa huring bendisyon kay ex-mayor Daep. Photo: Jasmin Cruz Orogo

Kasabay kan pagbulos kan uran an pagbulos kan pakidumamay kan mga Maniteño sa pamilya Daep sa pagkagadan kaini.

Ibinurol sa St. Peter Chapels, Legazpi City asin ilinubong kan Setyembre 4, 2017 sa Bicol Memorial Park. Nagsuspinde ki klase an mga eskwelahan sa bilog na Manito ta ngani makilubong an mga paratukdo asin estudyante asin ipailing ang pakikidamay sa pagmundo kan pamilya Daep.

Duwang bus asin nagkapirang jeep ang service kan mga taga-Manito, pwera pa sa mga pribadong behikulo kan mga nakidapit.

Napano ki mga tawo ang simbahan kan St. Raphael the Archangel sa Legazpi kung sain ginibo ang ultimong misa para sa namaaram na alkalde.

Siyam na padi ang presente sa misa kaiba ang mga naging kura sa Manito asin ang presenteng duwang padi digdi.

Yaon man an mga naging dekano (dean) asin staff kan Community College of Manito, an bilog na staff kan LGU-Manito, mga kagawad, mga maestra y maestro, mga estudyante, mga katrabaho dati, kapamilya asin iba pang mga nakikisumaro sa pagmundo kan pamilya Daep.

Maski mauran kan paglubong, yaon man giraray ang dakol na tawo sa pag-iba sa pag-atod kaini sa saiyang huring hantungan.

Labi ang pasalamat ni Mayor Joshua Mari C. Daep sa gabos na nakidamay sa sainda.

-- Ma. Theresa Daen

updated: September 8, 2017; 5:48PM