RHU Manito Nagharong-harong Para Magbakuna Kontra COVID

 

Si Kimberly Shane A. Cabacang, Nurse II (sa pinakawala),  habang pigtutudukan an sarong residente sa Brgy. Malobago, Manito, Albay.  Kaiba sa litrato ang tulo sa saiyang mga kagrupo sa RHU-Manito na si Maritess D. Bautista, sarong midwife, asin mga nurse na sara Roma N. Belen asin Rosario E. Guianan.

Nagharong-harong an Rural Health Unit of Manito (RHU-Manito) para magbakuna kan COVID-19 booster sa tulong magkataraning na barangay kan Manito ngunyan na Septyembre 27, 2022. 

Sarong residente kan Brgy. Malobago an nagheras kan saiyang rason kun nata siya nagpa-booster shot. Segun kay Mrs. Almeriza B. Añonuevo na sarong barangay record keeper, "Kaipohan magpa-booster para kumosog an samuyang resistensiya asin mas lalong maprotektaran." 

Dagdag pa niya, dakulang bagay sainda ang pagdigdi kan RHU-Manito para dae na sinda mamasahe. "Nakatipid ka na, na protektaran ka pa."

Sa direksyon ni Dr. Michael Angelo Marcelo C. Oñate, Municipal Health Officer (MHO) asin sa panginutan ni Joan Jett D. Cañada, Nurse II, coordinator kan programang COVID Vaccination, tulong grupo ki mga  Nurse Deployment Program (NDP) asin Job Order (J.O.) an saendang pig-deploy sa mga minasunod na barangay: Brgy. Malobago Resettlement Site, Tinapian, asin Manumbalay para maipaabot an saendang serbisyo sa mga wara pang bakuna sa COVID asin dae pang booster shot. 

Suma total ine an mga nabakunahan ki Pfizer sa tolong barangay ngunyan na aldaw: Brgy. Tinapian: 1st dose (1), 1st booster shot (12), 2nd booster shot (3); Brgy. Malobago Resettlement Site, 1st booster shot (17); asin Brgy. Manumbalay, 1st booster shot (10). 

Sara nurse Reyjhel D. Cincua asin Merche F. Brofas habang nagbabakuna sa mga residente kan Barangay Manumbalay asin Barangay Tinapian.

Segun kay Merche F. Brofas NDP Nurse II an objeto kan programa ay "to increase the number of Filipinos who have been given a COVID-19 booster shot, to help maintain the country's wall of immunity."  (tanganing mapadakol ang bilang kan mga Filipino na natawan ki booster shot asin makatabang sa proteksyon kontra COVID sa Pilipinas).

Dagdag pa niya, ang PinasLakas ay "Marcos administration’s way of boosting the country’s vaccine programs, so that progress towards a more health-conscious and safer nation is assured."  (ini an paagi kan administrasyong Marcos para mapakusog ang programa sa bakuna tanganing masigurado ang kalusugan asin kaligtasan sa bansa.)

Ang mga ibang barangay dudumanon pa kan RHU-Manito sa mga masunod na aldaw.

-- Jason D. Dasalla