Kurahaw kan Manito!

Ni: Cristina E. Bo

Ngunyan na eleksiyon, paha ang mga kandidato

Sa mga boto kang mga tawo kada baryo

Nagbuburukudan, makatukaw sana sa pwesto

Maray man ta mabago lamang ang sistema kang satong gobyerno

Dakol ang nagpresentar na magdalagan.

Pag kamo na nakatukaw dae kami pagdulagan

Himation pati ang pinakamaluyang tingog

Padabaon ang banwaan, magsirbing kasuro

Duman kita sa tatao makamidbid

Dae nakakalingaw, mas lalong bako lamang ganid

Duman kita sa tatao magmangno

Bako turog pag may nakekemaherak na tawo.

Duman kita sa bakong buta

Pirming muklat makatabang sana

Duman kita sa bakong bungog

Makamating kurahaw, listo tumindog.

Sasanlian ki panibago ang gobyerno kang Manito

Agad kang gabos, maray sanang serbisyo.

Kung sisay man ang manggana

Isipon ang banwaan bako ang sadiring bulsa.

Itatao mi saindo ang bilog na pagmawot

Kung matabang, dae sana maging kuripot.

Pakarayon ang sistema kang saindong termino

Padakulon ang trabaho, ibandera ang turismo.

Gibuhan man kutang paagi na ang bagas magbarato

Ta alangkawun man giraray ang kantidad kang sarong kilo

Idagdag ta na ang purupundong tubig asin kuryente

Tanganing dae na kami magparareklamo sa FB.

Kung sisay man na Poncio Pilato ang manggana

Magtarabangan kita asin mag urugma

Ta garu dakol na pagbabago ang iwawaras ninda

Tanganing ang kada saro umuswag na baga.

Dae ka magtabang ta muya mo sana parakpakan

Magtabang kuta su dae napipiritan

Mas maray nang aliun ang pagkamahambog

Ta kaipuhan kang gabos ang saindong sarig asin kusog.

Dae man nindo magibong perpekto ang mundo

Mawot ming maging maray sana kamong ihemplo

Dae man nindo matukdol ang mga bituon

Kuta na maulugan ang mga problema ki solusyon.

Kita man na mga botante,

Bumungkaras na asin maging responsable

Dae nanggad masiraw pagtinawan na paipit

Ta pag-abot ki panahon kita man sana ang mamimiripit.

Ang pinakamaluyang ing-ing garu mamamati na

Kang mga bagong lider na boborotohon ta

Lugud dae ini maging pangaturugan sana

Durudiritsong pag-uswag garu ipapamati na ninda!

--Manito's Time, May 2019