Curfew sa Manito tig-implementar na; shelter sa mga nagbalgar wara pa

.

Naipatupad na an Municipal Ordinance 05-2016 na nag-dedeklara kan curfew hours puon alas dyis ki banggi sagkod alas kuwatro nin mamaaga sa bilog na Manito pero wara pa nin shelter an munisipalidad para sa mga nagbalgar kaini. Naaprobahan ini kan mga Municipal Councilors asin naimplementar an nasabing ordinansa kan Oktubre 20, 2016 para maiwasan an theft, robbery, asin illegal activities. 

An shelter siring kan evacuation center pigpondohan kan Local Government Unit (LGU).

Sigun kay COP Rolando Guiriba, “saru an Manito sa class C Municipality sa Albay, meaning saru sa mga saday asin pobreng lugar kun kaya dai naka-provide ki shelter an Manito lalo na for minimal case man lang ini.”

Huli ta may mga remote area an Manito dai ini kayang libuton kan kapulisan kun kaya katabang an mga Kapitan asin mga tanod sa pag-implement kaini. Sa istasyon kan pulis idadara an mga nadakop sa kada barangay asin i-tuturn over man sana ini sa mga magurang pagka-aga. Willing su boot sindang i-accommodate an mga ini maski wara pang facility.

May koordinasyon an kapulisan sa Department of Social Welfare Development (DSWD) huli ta sainda tigtu-turn over an mga ini. MSWD an namamahala asin nagmamanehar sa shelter. Samantala, arayo an DSWD sa istasyon kun kaya tig-suggest kan kapulisan na arani sa istasyon itugdok an shelter ta dai maiiwasan na dadagsaun ini kan mga magurang.

Dagdag pa ni COP Guiriba, magayon ini ta dahil nag-uuswag na man an Manito ini an tamang panahon para matawan ni Mayor ki shelter para sa arog kaining kaso. I-o-open niya su boot ini sa Sanggunian para matawan nin lugar kun sain papatinirun an mga madadakop. An nasabing shelter baku sana para sa mga naglabag sa curfew kundi pati sa mga battered wife asin mga aki na naglabag sa batas.

An mga minasunod an mga penalty sa mga naglabag sa curfew ; (1^ST offense) Warning, (2^nd offense) pag-attendir kan magurang ki seminar, (3^rd offense) pagbayad kan magurang ki kantidad na  ₱500.00 o mag-community service sa laog nin limang aldaw, Lunes hanggang Biyernes sana. Kun dai nagbayad o nag-community service an magurang masasangatan ini nin criminal complaint sa korte asin pwedeng makulong na dai mababa sa duwa hanggang limang aldaw o lagpas pa depende sa korte.

Sa ngunyan wara pa nin nadadakop na naglabag sa curfew hours.

— Mary Joy Principe buda Welsie Abellano