San Roque pinaamo ang Fighters, 80-63

Ni: Catherine Joy A. Daep

Mga litrato hale kay:  Jomari Bulawan Gonzales

          Nailing kan mga tawo sa Manito People's Centrum kun pano pinaamo kan Cawayan San Roque ang  Cabit Fighters sa ikatulong kawat sa 2018 Mayor's Cup kan Agosto 25, 2018.

          Dakulang bagay talaga an depensa sa kawat, huli kaini nanggana an San Roque kontra Fighters sa iskor na 80-63. Igot na depensa an pinaada kan kupunan na nagpamantiner kan saindang kalamangan puon 1st quarter sagkod magtapos asin nagresulta man sa saindang foul troubles, na nagtao man ki tiyansa sa Fighters na makaduman sa free throw line. 

          Segun sa player kan San Roque na si Matt Adrian Guiriba, no. 8, bago pa magpuon an kawat tigapagirumduman niya na an saiyang teammates manungod sa depensa. 

          Sabi niya,"...we need to step up our defense para even slight chances pwede namin ma-minimize our opponent on attacking the basket." 

          "We tried our best na madepensahan ang kalaban and thankfully it resulted to our big win," dagdag niya pa. 

          Pag-abot naman sa mga turnover, parehong kupunan an nagsapar ki grabing turnovers. Sa first half kan kawat, an mga turnover an puminilay sa Fighters huli sa miscommunications, errors, steals buda violations. Pag-abot kan 2nd half an San Roque naman an nagkaigwa ki grabing turnovers buda Fighters naman an nabawasan ang turnovers. 

          Mas naging organisado an Fighters asin mas ginanahan huli sa suriyaw kan saindang teammates. Pero buminawi man giraray an San Roque asin pinaabot pa sa 14 an saindang kalamangan sa pagtatapos kan 3rd quarter. Dakulang bagay digdi an mga 3-point play na ginibo ni Guiriba.  Ini an saro sa mga nagpamantiner kan momentum sa San Roque. 

          Ngunyan, wara ki perpektong kawat. Sa kawat na ini, may diit na problema sa officiating. May technical fouls na dae nagkaarapudan, arog kan pagtatapos kan 2nd quarter, sarong player kan Fighters (Desonia, 17) an naglaog sa court buda nakakapot pa kan bola na daeng tigapalitang parakawat kan saindang kupunan. May saro man na player kan Fighters an nakalaog na sa painted area miyentras may naga-free throw.  Sa 4:45 kan 4th quarter, matapos an time out, naglaog si J. C. Adamos (7) sa court na dae nakapakaray o dae naka-tuck in an bado na dapat kutang apudan ki technical foul.  

          Dae na kuta maulit an pangyayaring ini sa mga masunod pang kawat kan 2018 Mayor's Cup. Makakaapektong maray kuta sa kawat an mga uncalled violations na ini. Mahihiling na mapabor kuta ini sa San Roque kun nagkaarapudan.  Pero sa udyan ginana man giraray kan San Roque an kawat. Patunay na nakadistino talaga an kawat na ini sainda, an saindang inot na gana. 

The Scores: 

San Roque (80) — Guiriba 16, Mayores 15, Belencio 14, J. Mabilin 11, Babasa 7, Zepeda 7, Remes 4, Asiado 2, Santillan 2, Azotea 0, Benvuega 0, R. M. Mabilin 0, Peñarubia 0, Reales 0, Yanga 0. 

Fighters (63) —  Adamos J. C. 19, E. Dioneda 11, Doctor 9, Tripulca 7, De Asis 6, P. Arabaca 4, Viñas 3, Adamos J. E. 2, Atuli 2, H. Arabaca 0, Balaguer 0, Briones 0, Dadea 0, Desonia 0. 

Quarterly Scores: 

20-14; 40-31; 58-43; 80-63 

Note: Scores presented as recorded in the game's statistics sheet.  

.