Su Jip Kong Maurag

Ni: John Rey Mangampo

Mari barkada, ako saimo may iistorya

Manungod sa jip sa Manito, nakasakay ka na?

Su plite mong sisenta, kumusta ang experyensya?

Kung puon banwa sagkod legazpi nakasabit ka?

Ata rani ka padi ako may itaram pa,

Ta su jip digdi sato, ako naoogma.

Ang pwedeng tumukaw bayntsingko daa,

Nata kan pag ali mi ta naging kwarenta na?

Gulpi su nakataplod, gulpi su nakasabit

Gulpi man su nasa tahaw na biyong nagkairipit.

May masakay pa, tibaad pwede pa makasingit,

Kung dai na ta makabit maski grabe ang init.

Parekoy ang jip digdi sato matitibayon,

Sisapar kan pasahero kaya nindang tiuson

Mantang panuon na, iyo pang dasuk-dasukon

Kanugon man daa kaya, mga paltarason.

Mano, aram ko sinda nag-aanap man nin kwarta,

Pero iyo man baga kita, parehas sana.

Kaipuhan talagang magtios pag masakay ka?

O pwede nindang baguhon ang sistema ninda.

Pangapudan ko sana sa mga jip digdi sato

Na isipon man nindo namamatean nyamo.

Komportableng byahe sana maitao nindo samo,

Ngani maray asin burunyog iribahan nyato.