Illegal Tapping, Sarong Dahilan kan Pawara-warang Suplay nin Tubig

Pilahan sa pag-arok ki tubig pag banggi sa Hologan. Photo:  Marissa Dolosa

Saro sa mga problemang nakakaapekto nanggad uro-aldaw sa pagkabuhay kan mga tawo, lalo na kan mga Maniteños iyo an maluya asin pawara-warang suplay ki tubig. Ano an dahilan kaini buda ano an mga posibleng solusyon digdi?

Segun kay Engr. Louie Luna kan Engineering Department kan Local Government Unit (LGU) kan Manito, “an water system ta digdi may problema na talaga…dakulon na factors iyan: inot, illegal tapping, panduwa, an kalumaan kan mga pipes o mga tubo.”

An illegal tapping iyo ang ilegal na pagkabit o pagsugpon ki mga water hose pasiring sa mga harong tanganing magkaigwa sinda ki “sadiri” nindang linya. An sarong linya legal iyan kun ang tagharong nag-apply sa munisipyo para sa pagkabit ki tubig sa saindang harong. An nangyayari sa sarong source, dakulon na households ang nagkakabit maski dai rehistrado kaya minaluya, minsan ngani nawawara, an bulos ki tubig.

May mga plano daang medyos an LGU sabi ni Engr. Luna manungod sa isyung ini. Inot, pag may bulos an sarong purok, pwede duman magkua ang area na daing bulos “pero bako gabos natatawanan, may limitations man syempre,” sabi pa ni Engr. Luna. Ikaduwang opsyon, ang pag-metro kan tubig sa kada harong o establisimyento. Ini an nahihiling na “long-term solution” sa problema ki tubig digdi ta syempre kung may bayad na daa an kada patak kan tubig, magtitiripid asin magmamakulog nanggad an mga tawo sa paggamit kaini. Pero an gabos na iyan plano pa man sana, dai pa man naiimplementar buda bako pa pinal.

-Glorilyn D. Reodique

                            

          Katakod kaini, kadipisilan sa tubig an hanggang sa ngunyan dakulang problemang kinaaampang kan mga residente kan Brgy.Hologan.Sentimyento kan kadaklan, dakulang sakripisyo an magpila asin mag-arok sagkod sa kamatangaan nin banggi ngani makakua maski diit na tubig na pagdidiitdiiton sagkod na umabot an utro ika-3 aldaw. Ini kaya an iskedyul kan patubig na pigpapagultanan sa tolong purok. 

         Dae kaya daa kaya suplayan an 4 na purok nin sarabay. Dagdag pa kan mga residente,masuwerte kung pag-abot kan iskedyul umabot an tubig. Minsan kaya maluya o kun bako nararaot. Kaya ngunyan na arani nanaman an eleksyon ma'wot daa ninda na matawan na nin magkakanigong solusyon an problema sa tubig. 

          Dagdag pa ninda,"lugod an pagkakaigwa nin maayos asin sistematikong patubig sa brgy. an enot na tawan pansin kan mga maibubugtak na mga pamayo kan satuyang banwaan."  

-Marissa D. Dolosa

May 7, 2016