Palali Eco Farm and Spring Resort binuksan sa sitio Nasipit, Barangay Nagotgot

Promotional poster sa Facebook page kan Palali Eco Farm and Spring Resort

Sarong pasyaran asin karigusan ang binuksan sa sitio Nasipit, Barangay Nagotgot, Manito, Albay kan nakaaging Pebrero 8, 2020.

Ang nasabing bagong tourist spot pinangaranang "Palali Eco Farm and Spring Resort."

Segun sa nagpapadalagan kaini na si Mr. Alejandro Dajac, ang pangaran kang resort ay hali sa sikat asin gurang na kahoy sa may karigusan, ang PALALI o Catmon na bistado kang mga taga-Nasipit.  Ang nagtao saiya nin inspirasyon para buksan ang arug kaining pasyaran ay para magsilbing ehemplo sa mga taga-Nagotgot na ang daga asin ang kagayunan kang kalikasan ay pwede pang mapakinabangan.

                   

Hali sa tataramon ni Michael Jordan na "Don't be afraid to fail.  Be afraid not to try" pinagsumikapan niyang isagibu ang naisip na makakatabang asin makakarahay sa saendang barangay. 

Ang entrance fee kaini sa ngunyan ay P25.00 sa gurang, P15.00 sa aki.  Ang cottage digdi P250.00.  On-going pa ang paglakaw kang mga lisensya kaini, kairiba ang pagpapakaag nin kuryente.

Segun kara Milda M. Andes asin Gen Abellano na nag-atendar asin nakasaksi kan opening kan lugar, ang resort ay magayon, lalo para sa mga nature-lover.  Dagdag pa ninda ang pagiging “peaceful” kaini.  Ini daa ay magtatao nin unra sa saindang barangay bilang saro sa bagong tourist spot.

Mr. Alejandro Dajac (nasa too) kaiba sara Kyla Dawal buda Sharmaine Docdocos kan Manito's Time

Idinagdag man ni Mr. Dajac ang saiyang pasasalamat sa Diyos na nagtao saiya nin idea na gibuhun ang arug kaining pasyaran na makakatabang sa saendang barangay. Sinabi niya na instrumento lamang siya na ginamit kang Diyos para sa ikakarahay asin mas ikakagayun kan saendang lugar.

-- Kyla Dawal sa tabang nara Sharmaine Docdocos buda Nonelyn Loristo