Magboto Para sa Pamilya

Ni:   Jonel D. Arizapa

Local and National Elections poster kan COMELEC.  Ilingon ang website kan COMELEC para sa mga importanteng impormasyon manungod sa eleksyon.

Kada saru satuya may mga manok na para sa mga pigralabanang posisyon. Ano mananggad an basehan ta sa pagpili sa borotohan?

Igwa satuya na nagpipili dahil sa matanog an pangaran; kumbaga sa termino kan millennials "pa-famous".  Sinda su mga tipo na nakalakop kun sain an pangaran. Igwa na nakasabay sa mga pangaran kan tindahan. Igwa man nakadukot an litrato sa mga pagbati kada may okasyon partikular na kun pista o pasko. Igwa man satuya na muya an kandidato ta artista o gwapo o magayon.  Igwa na nagkapira na sikat sa telebisyon o social media. Diit sanang pagparumdom mga kapwa ko botantes, an eleksyon lain man sa pageant o showbiz; manungod ini sa kun siisay an dakul na mas maitatabang sa kauswagan kan nasasakupan niya.

Igwa man na nagkapira na kandidato na dati nang sikat na naging mas sikat pa dahil sa nakulong.  Sinda su mga kaiba na pwedeng may tagline na "nagkurakot, nakulong, nagdalagan gilayon". Tatawan mo pa ba ki pagkakataon na bulsahon kan mga arug ninda an pundo na dapat kuta na magagamit para sa ikararahay kan banwaan?

 May nagkapira na may "pairak-effect" o sabihon ta nang kurakot na nag-aagad nin simpatya kan tawo. Igwa man nin mga naglatag nin mga planong kan inot pa na eleksyon na sagkud ngunyan plano man gilayon. Dai kita magpadara sa mga maaamot na tataramon ninda. Gamiton ta an satuyang tamang paghusga base sa pakamidbid ta sainda.

Kaiba man sa eleksyon an posisyon para sa mga Sangguniang Kagawad, Vice-mayor, buda Mayor. Pag-isipan tang maray kun sirisay an ikaraag ta sa mga posisyong ini. Dai ta naman lugod pagbotohan tamili kadugo ta sana o amigo lalo.

Kun aram ta man sanang igwa nin iba na mas may magiginibo, botohon ta an sa iling tang kaya supurtahan an pangangaipo kan satuyang banwaan arug kan: padagus buda malinig na tubig sa kada arong; diritso buda mas makusog na suplay nin kuryente; maray na tapukan buda maray na pagproseso kan mga basura; makusog na suporta sa mga pang-eskwelahang institusyon; buda organisadong transportasyon mapatraysikel man o jeep.

Dai sana kita makontento sa mga dati ta nang midbid. Midbidon ta man su mga baguhan ta kun minsan yaun sainda an mas dedikado kaysa sa mga datihan na. Kun maray an padalagan kan mga lideres na satuyang binoto kan dating eleksyon, kita an makakataram kun maray sindang lideres o dapat baguhan na. Warang maraot sa pagbalo nin bago kaysa sa makontento sa mga iyong-iyo na natapos na su termino na warang maray na pagbabago.

 Igwa man nin mga kandidato na subok nang may naginibuhan. Imantenir ta sinda sa posisyon. Bago ta bilugan sa balota an ngaran kan kandidato, husgahan ta muna ki maray kun sirisay an bibilugan ta. Kun aram tang "display" man sana, dai na pagsabaya. Maray pang dai malagan gabus sa posisyon sa balota kaysa sa pikit-mata tang laganan.

Pilion ta an mga kandidato na dae lang sa panahon nin pangangampanya mamamatean ta an saindang presensya.  Ang pilion ta an kun siisay an matao nin PAG-USWAG NA NAIILING. Maging wais na kita sa pagboto. Kada saro satuya may kakusgan kun siisay an ilalaag sa pwesto. Nakadepende sa desisyon ta kun anong klaseng administrasyon an magkakaigwa kita.

Kaya, kun padaba mo an pamilya mo, magboto ka nin maray.